Kiçik və orta sahibkarlığın dəstəklənməsi Azərbaycan Respublikasının siyasətinin əsas prioritetlərindəndir. 1 yanvar 2019-cu il tarixdən etibarən vergi qanunvericiliyinə edilən dəyişikliklər kiçik və orta sahibkarlığın fəaliyyətinin təşviq edilməsinə yönələn müddəaları özündə ehtiva edir.
Kiçik və orta biznes (KOB) klasterinə daxil olan şirkətlər KOB reyestrində qeydiyyata alındıqları andan etibarən 7 il müddətinə mənfəət, torpaq əmlak və müvafiq təsdiqedici sənədi əsasında istehsal, yaxud emal məqsədləri üçün texnikanın, texnoloji avadanlıqların və qurğuların idxalı üzrə əlavə dəyər vergisindən azad edilirlər.
Mikro və ya kiçik sahibkarlıq subyekti olan hüquqi şəxslərin innovasiya fəaliyyətindən əldə etdikləri mənfəəti “Startap” şəhadətnaməsi aldıqları tarixdən 3 il müddətinə mənfəət vergisindən azaddır.
Mikro-sahibkarlıq subyektləri üçün nəzərdə tutulan güzəştlərə sahibkarlıq fəaliyyətindən əldə olunan gəlir və mənfəətin 75%-nin vergidən azad edilməsi daxildir.
Sadələşdirilmiş vergi ödəyiciləri kimi təsnif edilən kiçik sahibkarlıq subyektləri artıq 2 faiz dərəcəsi ilə vergiyə cəlb ediləcəklər.
Sadələşdirilmiş vergitutma metodunu tətbiq etmək hüququ olan fərdi sahibkarlar və müəssisələrin dairəsi əhəmiyyətli dərəcədə məhdudlaşdırılıb. Məqsəd vergi güzəştlərindən faydalanmaq hüququ olmayan şəxslərin həmin güzəştlərdən istifadə etmələrinin qarşısını almaqdır.
Yeni prosedura görə vergi ödəyicisi tərəfindən müvafiq inzibati şikayət verildiyi təqdirdə onun bank hesabından və ƏDV depozit hesabından vergi orqanları pul vəsaiti silməyəcəklər. Hesabdan pul vəsaitinin silinməsi yalnız inzibati şikayət üzrə müvafiq qərar verildikdən sonra həyata keçirilə bilər.
Bir sıra maliyyə sanksiyaları sərtləşdirilmiş və yeniləri tətbiq edilmişdir. Əmək müqaviləsi bağlamadan işçilərin işə cəlb olunmasına görə işəgötürənə qeyd edilən pozuntuya təkrarən yol verildiyi təqdirdə 6000 AZN məbləğinə qədər maliyyə sanksiyası tətbiq edilir. Elektron qaimə-faktura və ya elektron vergi hesab-fakturası təqdim edilməli olduğu halda bu qaydaya əməl etməyən şəxslər təkrarən həmin qayda pozuntusuna yol verdikdə şəxsə təqdim edilmiş malların satış qiymətinin 40 faizi miqdarında maliyyə sanksiyası tətbiq edilir.
Kənd təsərrüfatı məhsullarının istehsalı ilə məşğul olan (o cümlədən, sənaye üsulu ilə) hüquqi və fiziki şəxslər həmin fəaliyyətlə əlaqədar mənfəət, ƏDV, əmlak vergisi və sadələşdirilmiş vergidən 2024-cü ilin 1 yanvar tarixinə qədər azad edilmişdir.
.png)
Xidmət sahəsində fəaliyyət göstərən fərdi sahibkarlar (məsələn, bərbər, fotoqraf, dərzi, ofisiant və s.) üçün sabit aylıq vergilər müəyyən edilmişdir. Qeyd edilən aylıq ödəniş əməliyyatın kateqoriyasından və coğrafiyasından asılı olaraq dəyişir.
Ətraflı məlumat üçün bura daxil olun.